今日去左睇狂舞派，開頭對依套野無咩期望，連Trailer都懶得去睇，但近來都見唔少人話激戰同狂舞派值得去睇，激戰唔洗講啦，張家輝!? 必撐! 至於狂舞派? 有邊個?
「為左 _ _，你可以去到幾盡?」
依句名言一直係網絡上瘋傳，就算對套野零認識，我都去支持下。
一開始睇個短短幾分鐘，我心諗: 依套Cult片黎?
但當我睇完之後，雖然唔係話真係好好睇，而且有好多地方都睇得出都幾"新"，但我仍然好投入咁去睇，因為我覺得香港電影係需要更多依類青春電影。
老老實實，(以我記憶之中)套野除左阿BOB，糖兄(唔知係咪)，黃貫中之外......其他人我真係全部唔識，一套無咩大明星嘅電影，從另一個角度睇，咁先係最吸引我。
講香港電影黎講，近年嘅青春電影，我只係記得烈日當空，入面演員又係全部唔識，但勝在佢地真係年青人，真係為搵班差唔多歲數嘅人做學生妹學生哥，而唔係好似TVB咁，成日搵班廿幾歲尾嘅半中女做學生妹......其實真係頂唔順。
以香港電視黎講，我只係記得N年前套青出於藍，點解阿Sir係阿Sir.....仲有尖子攻略。但係當中有幾多個"學生妹學生哥"係十幾歲?
點解那些年咁紅? 因為夠青春，後生岩睇，大人都可以回味"上當年"，我相信依套野令好多電影人都趺眼鏡同埋無預期咁高票房同人氣。
香港呢? 其實都睇厭左好多港產.....唔係警察臥底就係黑社會電影，再唔係就係啲情情塔塔少少咸多多趣嘅"大人"電影，而演員更加唔洗講，來來去去都係個堆，一年之中都唔知係幾多套電影見過幾多次同一個演員......
其實香港真係需要多啲青春校園電影，唔洗一定要明星先去做。
講返狂舞派，雖然演員我唔識，但係睇得出演員同製作團隊真係花左好多心思同心機係套電影上面，可能預算有限，好多地方可以再做好啲，但都令我睇到某啲位都起左少少雞皮。
對我黎講，當然最期待佢個句" 為左_ _，你可以去到幾盡"
丫......點知竟然係由個ABC講出黎，仲要係英文!即時無哂霸氣同共嗚!!嗚呀!!
劇中班年青人都搵到自己興趣同目標，都好努力用自己青春去達到自己目標，正如柒良所講:『青春唔係Chock出黎』!
睇完之後，我都要諗下有咩攪作先得!
其實我有句青春名言架! 唔知有冇人記得!
Search